O Teologado Diocesano San Rosendo
O Seminario Maior da Diocese de
Mondoñedo-Ferrol está, desde o ano 1986, na cidade de Santiago de
Compostela. Os seminaristas maiores forman a comunidade do Teologado
Diocesano San Rosendo, onde se preparan para seren os futuros
sacerdotes da nosa Igrexa Diocesana.
A comunidade do Teologado Diocesano
está formada polos seminaristas e os seus formadores, compartindo
todos un mesmo obxectivo: formarse como verdadeiros pastores a
semellanza de Xesucristo, Mestre, Sacerdote e Pastor.
A experiencia da vida comunitaria vai
creando, entre os que son chamados a formar o futuro presbiterio
diocesano, fortes vencellos de comunión fraterna, que axudan a
descubrir en profundidade tanto o misterio da vocación coma o
misterio da Igrexa.
Os seminaristas maiores da nosa
diocese son alumnos do Instituto Teolóxico Compostelán, centro
agregado á Facultade de Teoloxía da Universidade Pontificia de
Salamanca.
|
